N.A. Nekrasov

PHABENGRO

Parudja Romanes: V. Sh. Rjedaktoro: Lev Cherenkov


 
Na psirdjom e chjurjasa
pir vesha pir bare,
Na bestjom pasho drom
dre kaly ratori,
Xas'kirdja man, ternes,
lakiro gozhypen,
Te miro kamlypen!..
Ex, terny ranori...
 
Pashe vesna e bar
sy butjasa pherdy.
Me skedava kashta
te bagava lokhes, -
Dykh! terny xulany
nadur mandyr terdy:
Zashundjape, pre mande
vzdykhtja gudlores.
 
Pir gava i pir forja
me psirdjom-gulindjom,
But rakljen gozhonen
me dykhavas odoj,
Sajekh latyr fedyr-
gozhedyr nalathjom,
Uzh pro sveto parno
na lathava, syr jej.
 
Muj parno te gudlo,
late - kale jakha!..
Te palso riskirdjom
mri gily daranes?
Jej nichi na phendja,
lokhores progeja, -
Obdykhtjape: jakha
puradjom dylynes.
 
Me shundjom, syr phenen
o gavitka dzhjuvlja,
So sarendyr raklendyr
me som gozhedyr.
Syr o kham, muj lolo,
zoralo barijem,
E pharestyr mre krenca
bala kovledyr...
 
Roskheldjape ilo
pro mardo, pro vavir,
Ta syr me podykhtjom
pro da kher barvalo,
Tradejom mre godjatyr
ranja sygedyr,
Zalejompe butjasa,
me - gavitko raklo.
 
Do poratyr ke me joj
but moly psirdja:
Te dykhel mri buty,
te prodzhjal pire chjar;
Syr rany, jej sabnasa
puchibe chjurdeja:
Xaj, palso butedyr
na bagava shukar?
 
Me dykhava dre phuv,
me nichi na phenav,
Ban'kirava shero
teledyr ladzhjanes
- De-ka phabelyn tuke
me dre phuv zachjuvav,
Khinyjan tu, dykhav,
mro rakloro, phares!.
 
- Angledyr, ranori,
tu sykljov te keres!
Pleskir tuke devel,
mange pomoł' dejan! -
Syr joj mandyr kamja
e lopata te lel,
Pro chjachjo miro vast
angrusty udykhtja.
 
Ranorjate e jakh
xoljames kalyja,
Ranorjate dro chjam
xach'kirdo rat mardja!
- So tusa, ranori?
Palso tu podykhtjan
shylypnasa pre man-
de, syr e zyma javja.
 
- Phen, konestyr sy tute
angrusty-suvnakaj?'
Syg phurjosa, koli
tu dzhinesa saro.
- De-ka te podykhav -
akana i adaj! -
Pal angusht uxtyldja
man parno vastoro.
 
Khamoro na dykhav,
sare djosa me zdrav,
Na dejom lake me
angrusty-suvnakaj...
Vzripirdjom vrazedyr,
so som gozho raklo,
Chjamudav la dre chjam
akana i adaj!..
 
But ratja probestjam,
na risjona jone.
Me, terno, dro jakha
lakire sa dykhtjom,
Roskhuvavas chjurja,
parnore, pharune,
Bagandjom gilorja,
xach'kirdes chjamudjom.
 
Podchjude but chjupnja,
so nikon na ginel,
Dro baro kher ranjatyr
avri man traden.
Pro kirko roiben.
Ex!.. Nane te kamel
Chjororeske rakleske
gozhone ranorjen!