A.S. Pushkin

PARAMYSJA VASH PHURESKE I MACHJORESKE

Pirilydzhija N.A. Pankovo (Moscow, 1936)

 
Dzhindja phuroro phurorjasa
Ko baro, pribaro sinjo morjo;
Jone dzhindle dro kirno kheroro
But... trianda te trin bersha.
Phuro uxtyldja njevodosa machjen,
Phuri kerdja thavendyr poxtan.
Jekhvar chjurdyja jov njevodo dro morjo,
Javja njevodo jekhasa blatasa.
Vavir molo zmekja les dro morjo,
Javja njevodo chjarjasa morjostyr.
Dre trito molo zmekja phuro njevodo,
Javja njevodo jekhore machjoresa,
Suvnakuno sys adava machjoro.
Vzrundja suvnakuno machjoro,
Manushane glosasa rakirla:
"Otmek man pale, phurorom, dro morjo,
Mishtypen baro me otdava,
Me otdava, so tu zakamesa".
Divo i straxo lyja phurores:
Zalyjape jov trianda te tri bersha
I na shundja, sob machjo rakirdja.
Otphendjape adale machjestyr
I mekja jov les lachje lavenca:
"Kokoro devel mek tut rakhela!
A tyro otkinyben na trebi;
Risjov pale dre sinjo morjo,
Dzhiv tu odoj peske pre rada".
Risija phuroro o rendostyr,
Rosphendja e phurjake vash chjudo:
"Dro vasta machjoro popyjape,
Xachija ada machjoro suvnakasa;
Manushanes machjo rakirelas,
Khere dro sinjo morjo mangjape,
Otkindjape uchje timinjasa:
Otkindjape, so lestyr pomangava.
Na kamjom me nichi te lav lestyr;
Otmekjom les dro sinjo dro morjo".
Pre phureste phuri zakostjape:
"Dylyno zhe tu, prostofilja!
Na dzhindjan, so te les machjorestyr!
Lyjan by tu lestyr kopano,
Amaro, dzhines, pharadjape".
Ne gyja ko sinjo jov morjo;
Podykhja jov, a morjo roskheldjape.
Pokhardja machjes ada morjostyr,
Podjavja machjoro i puchjela:
"Mro phuroro, so tuke trebi?"
Kerdja shero phuro; rakirela:
"Jav kovlo, mro machjoro, zrakh bidatyr,
Ex, nane dzhiiben phuromnjatyr
Armanja phuri pre phureste hazdela;
Trebi lake nevo kopano;
Amaro zhe, dzhines, pharadjape".
Otkhardjape machjoro phureske:
"Na rav shero i dzhja tu devlesa,
Nevo kopano javela tumende".
Risija phuroro o morjostyr,
A phurjate nevo uzh kopano.
Ne phuri uzh butyr zakostjape:
"Dylyno zhe tu, prostofilja!
Vymangljan, dylyno tu, kopano!
But li sy kofo amenge dre leste?
Dylyno risjov ko machjo tu,
Per pre chjanga, mang tu o kher".
Ne gyja jov ko sinjo ko morjo,
(Zaizdrandyja sinjo o morjo)
Pokhardja phuro machjes morjostyr,
Podgyja machjoro ko phuro o lavenca:
"Mro phuroro, so tuke trebi?"
Phuroro daranes rakirela:
"Mro machjo, jav kovlesa vash mange:
Sa butyr mri romny xoljasola,
Ex, nane dzhiiben phuromnjatyr
E phuri xoljamy kher mangela".
Otkhardjape machjoro phureske:
"Na rav shero i dzhja tu devlesa
Mek adjake: kher tumende javela".
Risija phuro e morjostyr, -
Phurano kheroro xasija,
A nevo kheroro terdo sy,
E barune, parnjakirde trubasa,
Udera sy tjesova te dembitka,
Phuri sy beshly pash e fenchtra.
I hazdyja koshyben pre phureste:
"Dylyno zhe tu, jekh lav, prostofilja!
Vymangjan o kher, prostofilja!
Risjov; ker o shero machjoreske:
Na kamam te javav krjestjankasa,
A kamam te javav dvorjankasa".
Gyja phuro ko sinjo morjo
(Hazdyjape morjo volnenca)
Te kharel machjores jov lyjape,
Podjavja machjo te puchjela:
"Mro phuroro, so tuke trebi?"
Jov shero zmeki, rozrakirela:
"Mro machjo, jav kovlesa vash mange:
Sa butyr miri phuri dylnjola,
Ex, nane dzhiiben phuromnjatyr:
Na kamel te javel krjestjankasa,
A kamel te javel dvorjankasa".
Otkhardjape machjoro pzureske:
"Na rav shero i dzhja tu devlesa".
Risija phuroro morjostyr,
So zh dykhela? Terdo nevo kher;
A phuri terdy sy pre da treme
Dre kuch sobolinno dushegrjejka,
Pre shero parchjovo kichka;
E mutja phurjate trinskirdjona
Suvnakatyr vasta xachjona,
Pre hera ada lole triviki
Pashyl late prastana pisxarja;
Joj marela len! bala riskirla.
Phuroro rakirela phurjake:
"Ne... lachjo dyves ranjake-dvorjankake!
Akana, haljov, saro uxtylla?
E phuri dyjape pro phureste,
Bichjadja vash buty phures dre shtala.
Oke kurko i vavir uzh prodzhjala,
I phuri zoralydyr hazdyjape,
Neves ko machjo phures bichjavela:
"Ko machjo syg dzhja mangipnasa:
Na kamam te javav dvorjankasa,
Te javav kamam tagaricasa".
Phuroro rakirdja men'kasa:
"So tu obxajape bjeljenasa?
Te prodzhjas, te phenes na dzhines tu,
Pre saben tu hazdesa carstvo".
Phuromny butydyr xoljasola,
Piro chjam dyja joj romeske:
"Ax tu, zlydnja, inke muj poravesa,
I na lela tut strax dvorjankatyr?
Dzhja ko morjo, rakirava chjestjasa:
A na tak - njevoljasa lydzhjana".
Chjororo risija ko morjo
(Kalyja o sinjo morjo);
Pokhardja phuro machjes morjostyr,
Podgyja machjoro ko phuro o lavenca:
"Mro phuro, so tuke trebi?"
Phurorom daranes rakirela:
"Mro machjo, jav kovlesa vash mange!
Neves mri phuromny buntynela:
Na kamel te javel dvorjankasa,
Te javel kamel tagaricasa".
Otkhardjape machjoro phureske:
"Na rav shero i dzhja tu devlesa!
Mishto! Javela phuri tagaricasa!"
Risija phuro pale morjostyr, -
A adaj - kralitka palaty,
Dre palaty phuromnja dykhela.
Pal skamind beshly sy syr tagarica.
Pashyl sy bojare te dvorjane,
Podchivena zamorsko bravinta,
Joj zaxala gudle prjanikosa;
Prithode ke joj sy xoljame stregarja;
Pro psike tovera jone rikirna.
Udykhi phuro, trashadjape;
Dre hera phurjake chjurdyjape,
"Mishtypen xoljame tagaricake!
Akana, romny, haljov saro uxtylla".
Na vzdykhja phuri pre phuroreste,
Priphendja te zbichjavel jakhendyr.
Poduxtne i bojare i dvorjane,
E dro men popyja phuromeske,
A dre porty poduxtne stregarja,
Te maren kamne o toverenca,
Manusha zhe pre leste sandlepe:
"Adjake phureske i trebi!
Angil tu javesa syklesa:
Besh dre peskiri shlyta!"
Oke kurko i vavir uzh prodzhjala,
I phuri zoralydyr hazdyjape:
Bareran pal phureske bichjavela.
Otrodyne phurores, jandle ke joj.
Phuromny phuroreske rakirla:
"Risjov, ker o shero machjoreske,
Na kamam te javav tagaricasa,
Me kerel xulanjasa dro morjo,
Te dzhivav dro Okijano-morjo,
A psirdja pal mande machjoro-by
I sys by pre buty chjachjunesa".
E chib otlyjape phuroreste,
Na jekh lav na zgyja e chibatyr.
Podgyja jov ko sinjo morjo,
Xas' kaly hazdyjape pre leste,
Xoljame e volny rozuxtnepe,
Sa prastana, rovena ruvesa.
Pokhardja phuro machjes morjostyr,
Podgyja machjoro ko phuro lavenca:
"Mro phuro, so tuke trebi?"
Phurorom daranes rakirela:
"Mro machjo, jav kovlesa vash mange!
Na dzhinom, so kerdjape phurjasa.
Na kamel te javel tagaricasa,
A kamel te javel masxarjasa
I te dzhivel dro Okijano-morjo,
Soby tu pal late psirdjan
I saro chjachipnasa vash lake".
Na phendja machjoro ni jekh lav,
Pir pany pororjasa mardja
I zmekjape machjo teledyr.
Dlengo ko morjo phuro sys terdo,
Ne ivja, risija ko phuri, -
I sozh: kirno kheroro angil leste,
Pashyl beshly phuromny,
A angil late rospyno kopano.
 
lcd телевизоры toshiba, ответы .