В. В. Шаповал

НАЧАЛО ЦЫГАНСКОЙ ИСТОРИИ

(2003)


 
Профессору Майклу Стюарту.
Ле Мишаскэ, кон сыкавэл о чячуно
дром лэ Рроменгэ тхай лэ гаженгэ.
Романы история
романэс стходы
Цыганская история по-цыгански сложенная
 
Э бутджиндлы дрэ романэ проблемы э ранори-магистер Hana Syslova Чехиятыр дыя мангэ э копия "Романы история" тходы ла ранятыр Milena Huebschmannova. Ода лыла пыя мангэ пиро ди тэ лыём тэ парував одолэ пэскэ сыр Романы история ваш руссконэ ромэнгэ, соб романэ чявэ др амари пхув джинэна, катыр явнэ о Рома и пир савэ пхува йонэ псирэнас hара, соб кажно романо чяво джинэл, савэстыр пхуранэ барэгодякирэ народостыр джяла и лэскро родо.
 
Рома как последняя волна расселения индо-европейцев и арьергард Великого переселения народов
Рома сыр агоракири индо-европакири группа и "палуно урдо" дрэ Баро народонгиро лодэибэн
 
Дэш шэлбэрша палэ о Рома гынэ э Индиятыр. Сыр ёнэ адава кэрэнас, нанэ амэнгэ джиндло. Екх мануш патяла, хай ёнэ джянас аври бут бэрша, екх бари семья пал ваврятэ. Вавир пхэнэла, хай Рома сыс екх группа набари (hалёв, 5-10 000 илэ), тэ ёнэ ракхэнас екхипэн пирдал о шэлбэршэнгро дром. Амэ на джинас ада, сыр ёнэ нашэнас Индиятыр - пирдал 10 бэрша? пирдал шэл бэрша? Дыкхно сы, хай дава сы о дром баро. О папы парувэнас пэскирэ даденгирэ дрома тэ вурмы тэ лэнас тэ псирэн шэл, мэк пашшэл, киломэтры дурыдыр кэ пашратякири (северно) риг. Сыр о папы парувэнас дрома и штэты, акадякэ кэрэнас о дада, тэ адякэ лэнгирэ чявэ, тэ ядыкэ дурыдыр. Бэштэ машкир разнонэ народондэ о Рома шукар джинэна лэнгирэ чиба тэ кэрэн годяса гадженца бутя. Рома дживэнас адякэ и парувэнас екх штэто прэ вавир, коли одой явэла фэдыр, или коли трэби сыс тэ чюрдэн пхурано штэтыцо, соб тэ нашэн марибнастыр или чёрорипнастыр.
Лэнгиро дром на сыс о дром кэ Греция. Ёнэ на джинэна, со йонэ попэрэна др ада пхув. Ёнэ камэнас тэ ракхэн пэс, тэ лэнгэ сыс пыно прэ бахт тэ рэсэн э пашратякири (северно) пхув Греция. На сыс лэнгиро дром о дром барэскиро, сыр о бар сыс чюрдыно тэ пыно, сыс лэнгиро дром, сыр о дром панэскиро, сыр о паны прастала кай тэлэдыр, сыр кэрла пэс про дуй, про трин тэ скэдэла палэ дро екх, сыр котэрэса джяла англэ тэ котэрэса нашэла дрэ пхув. Соскэ екх котэр одолэ Романэчявэ, савэ гынэ аври Индиятыр, дорэснэ э Греция? Нанэ амэндэ hалыно - соскэ. Дэвэл дыя адава.
 
Относительное единство ромских групп становится более заметным в Греции
Романо екхипэн зоралыя дрэ Грецыя
 
Др одо бэрша э Византия сыс барыдыр тэ барвалыдыр сарэндыр ваврэндыр пхувьендыр дрэ Европа. Тэло лакиро васт сыс Цыгни Азия (кай сы ададывэс э Турцыя). Сыр о Юстиниано сыс о тагари Византиякиро (527-565) пынэ тэло васт лэскэ Сирия, Армения, Балканы, Египто, Италия, тэ котэр Испаниятыр. Др одо бэрша о Рома сыс дрэ Индия. Нэ сы локхо тэ кэрас дрэ годы э патрин, сыр дур урняндынэ о лава пало барвалыпэн тэ палэ зор Ромайэнгири Империякири. Греки кай Византия кхарэнас пэс о Ромайи. О нава о Ромайи тэ о Рома сыс hалёв пашэдыр екх ваврэскэ. Гынэ бэрша, о Рома лынэ тэ нашэн Индиятыр. Лэндэ сыс дуй дрома: тэ хасён дро дром машкир ваврэ народы, или тэ джян палэ нэви бахт, тэ родэн э пхув, кай дживэла о зурало и барвало народо. Адалэ, кон дорэснэ э Греция, дро дром дживэна кхэтанэ. Лэнгири чиб ракирна пал адая лакири екхипэн и дадывэс.
Екх дуйто екхипэн сы дыкхно: сыр 4-6 баря бэрша палэ индо-европакирэ мануша авнэ кэ Греция сыр-нисыр одолэ пхувьятыр, кай сы надур э Индиятыр, адякэ екх бари бэрша палэ о Рома парувэнас о дрома тэ рэсэн кэ Греция. На дарава тэ пхэнав: котэрэса ёнэ джянас адалэ дромэнца, савэ сыс бут шэлбэрша палэ о нэвэ дрома ваш адалэ мануша, савэ ададывэс сы хулая дрэ Европа, тэ екх (англуны!) адалэндыр сыс э Греция. Сыр амэ гинаса, хай о Баро Лодэибэн дрэ Европа (2-8 шэлбэрш) тходя о агор э индо-европакирэ дромэнгэ, сы амэнгэ тэ пхэнас, хай о Рома сыс э палуны группа др ада историякиро процессо. О Рома сы о индо-европакиро арьергардо. Ёнэ рэсэна кэ Европа, коли о Мадьяры сыс о грэнгирэ дромэнгирэ мануша, ёнэ родэнас пэскэ э пхув дрэ Европа. Др ада Европа, кай Сарматы, Авары, Готы, Хазары тэ ваврэ зуралэ дромитка народы сыс нашадэ ко агор, о Рома сыс ракхнэ. Тэ авэл амэнгэ о лав: на дур, сыр атася, ваврэ сыс зуралэ, нэ ададывэс ко агор нашадэ. Др адасави Европа явнэ о Рома. Соскэ ёнэ на сыс нашадэ? Сыс ада Дэвлэскэ дрэ годы тэ ракхэл лэн прэ да шукар пхув. Амэ рипирэна, хай о паны кай прастала дурыдыр, кай джяла тэлэ дрэ пхув. Акадякэ о Рома дро баро пэскиро дром Индиятыр сыс котэрэса гарадэ машкир ваврэ народондэ, котэрэса гынэ дурыдыр. Сарэ Рома дрэ Европа сыс бэшлэ пиро баро периодо кэ Греция (Византия). Одой сарэ Романэ группы, кицы дорэснэ да пхув, дживэнас екх паш ваврэндэ. Амэ патяса, хай лэнгирэ бутя тэ рэсэн маро, лэнгрэ традицыи тэ лэнгири чиб сыс кэрдэ екхорэ др одо штэто. Ёнэ сыс кэрдэ екх народо (этносо). О романо екхипэн, саво сыс лыджино Индиятыр, о екхипэн ратэскро тэ чибакиро зоралыя дрэ Грецыя. Грецыя явья да пхув, кай бария о нэво Романо екхипэн. Да нэво этнососкиро екхипэн сы дыкно ададывэс, сыр амэ джинаса, сыр амэ дыкхаса про Европакирэ Рома, сыр амэ шунаса екх ваврэс.
О Дром Баро сы бутыр пандж баря километры (5000 км.). Тэ кэрас да дром трэби сыс Ромэнгэ тэ джяс 5 километры (екх-дуй мардэ) дро екх бэрш. Нанэ э бари буты? Екх романы генерацыя (поколение) дживэлас - тэ пхэнас - бут-набут биш бэрша, коли ёнэ сыс дрэ пэскири зор, тэ трэби сыс лэнгэ тэ кэрэн дрэ пэскирэ биш бэр екх шэл километры дром, соб лэнгирэнгирэ чяворэнгирэ чяворэ тэ дорэсэн ко агор э Грецыя. Сыр чяворэ лодэнас шэл километры дурыдыр дадэндыр, машкир лэндэ сыс штар-пандждывэсэнгиро дром прэ лаче грэндэ, э урдэнэнца. Адалэстыр сы дыкхно, сыр о Романо екхипэн сыс зракхно дрэ сарэ одолэ бэрша.
 
Покинув Грецию, цыгане стали кочевниками?
Рома гыя аври э Грецыятыр тэ лодэн?
 
1400-а (дэшуштар-шэлбэршытка) бэрша. О рома джянас аври Грецыятыр. Дро бэрша 1400-а лынэ о рома тэ нашэн Грецыятыр. Палсо чюрдэнас о пурано штэто? Кай дживэнас бахталэс - hалёв - трин шэлбэрша тэ бутыр, кай сыс лэндэ кхэра, бутя састырэнца, кай сарэ дрома сыс джиндлэ романэчявэнгэ, конэскэ сы э буты ты псирэн пиро гава тэ сыкавэн сыклякирдэн сапэн, рычен пал ловорэ. О барэ шэрэ, годявэрэ мануша на джинэна, савэ сыс романэ бари семьи, савэ дживэнас дрэ Византиякиро империя. Со тумэ пхэнэна? Др одо дывэса э телевизия на сыс, э пресса на сыс, дрэ архивы, дрэ лыла Рома попынэпэ набут. На джинас, хай явнэ Рома дрэ империя дро бэрш 1000, дуй шэлбэрша англэдыр? или трин шэлбэрша палэ? На сыс ко Рома интересо дрэ Грецыя. Со адава сыкавэла? Кэ со адава амэн лыджяла? О рома сыс о калэбалэнгирэ мануша, сыр сарэ ваврэ дрэ Грецыя. Ко бэрш 1400 ёнэ дживэна одой бут-бут бэрша, дро гава, пашэ форья, кэрэнас буты. На сыс ёнэ ваш Греконгэ о котэр экзотика, латхнэ пэскэ о штэто дро бутэ-ратэнгро, бутэ-чибьенгро, бутэ-этниконгиро империя. Пэрэнас дрэ якха токо ваврэ манушэнгэ, одолэ дромэскирэнгэ, савэ джянас пир э Грецыя. Ёнэ, ваврэ-пхувитка Европакирэ мануша дыкхнэ прэ ромэндэ сыр прэ экзотика. Лэндыр ячнэ о лыла палэ ромэнэндэ.
О рома на прастанас Индиятыр палэ лачи бахт, нашэнас - hалёв - барэ бибахтятыр. На чюрдэнас э Византия палэ бахт бари, традэлас лэн о марибэн. Бутэ-ратэнгири, бутэ-чибьенгири барвалы пхув, о ило э Империякиро, сыс о котэр гудло ваш бутэ бокхалэ вуштэнгэ. Нанэ со тэ кэрэн, о рома лынэ тэ чюрдэн э Византия. Катыр сы дава джиндло амэнгэ? Дава джинас, сыр э бэршэндыр 1442 лынэ мануша дрэ Европа тэ чинэн дрэ хроники (о лыла бэршэнгрэ), сыр авэнас екх пал ваврэстэ романэ бари семьи дрэ форья дур-дур Византиятыр.
 
Дро бэрш 1071 кэ Цыгни Азия о Турки-сельджуки тэ лэнгиро шэрэскиро Алп-Арслано мардэ э Грекон тэ лэнгирэ тагарис Романос о штартос ухтылдэ. Ада налачипэн скэрдяпэ Греконгэ пашо форо Манцикерт (Маназкерт, ко пашдывэс [юго] э барэпанэстыр Ван). Др одо бэрша сыс одой бут о Армяне. Тэ о рома - hалёв - дорэснэ одой. Одотыр сы дрэ романы чиб о лава Армяненгирэ: мом, чекат, бов...
 
Тэ кэрас дрэ годы э патрин. Сыс лачё августоскиро дывэс. О лынаскиро агор дыя э сарэ джидэскэ о палуно татыпэн. О лолоро кхам джялас пиро жужо болыбэн. На дур э барэпанэстыр о Рома мекнэ пэскирэ грэн тэ чяравэнпэ. Э Ромня гынэ пиро гава тэ мангэн, тэ зумавэн. Тэ окэ явья уклистэс о чяворо тэ ракирдя, хай дро гав сы шундло, хай о Турки мардэ лэ кралис Романос. Трашанэ пхурома лынэ тэ ракирэн, нанэ ли ёв о Романо чяво? Нэ палэ лынэ тэ скэдэн урдэна тэ традэн одолэстыр, кай гыно о марибэн.
 
Адякэ сыс э Турконгэ о дром кэ Грецыя откэрдо.
 
Нэ адава на сыс джиндло романэчявэнгэ. О пхуро Баро Дад, годявэр романо шэрэскиро на дыкхэлас дрэ историякиро перспектива, нэ дыкхэлас, кай тэ латхэл о барвало штэто.
 
О Рома чюрдынэ э Цыгни Азия тэ нашэн ада марибнастыр, тэ латхнэ о лачё штэто, сыр рэснэ э Греция.
 
Ваш пхираса. Дрэ Грецыя э сари культура пэрэнас тэлэ, э чиб пураны кирныя екхатыр. О Греки нашадэ э дифтонги, нашадэ о дыибнытко пэрибэн (casus dativus). Дылынэ акадэмиякирэ шэрэ сыкавэна, хай амарэ Рома чёрдэ ада саро. Нэ амэндэ сы э алиби, сыр дрэ амари чиб нанэ э дифтонги, (влахи, на ракирэн ничи). Ваврэ дылынэ хохавэна о свэто, хай мануша дыкхэнас, сыр дро форо Черновцы екх Ром бикиндя о дыибнытко пэрибэн екхэ гаджескэ. Дава сы хоханы дезинформацыя, сыр др одо времё на сыс одой гадже лылварэ. Акэ палсо Рома на выкэдэ о чячэвастэскиро (восточно) дром инкэ шов шэлбэрша.
 
О шэрэскро форо Византиякиро сыс кхардо Константинополис, сыр лэс о тагари Константино тходя (324-330). Про до штэто англэдыр сыс о форыцо Византион. Одолэ навэстыр сы о лав Византия. Дро бэрш Дэвлэскиро 1453 о Махмудо о дуйто э зуралэ вастэса лыя пэскэ одо форо. О Греки нашадэ о шэрэскиро форо империякиро.
 
Ваш пхираса. Ёнэ лынэ тэ ровэн, лэнгири репутацыя ачья киндякирды, лэнгири культура лыя тэ кирнёл дурыдыр. Дыкхнэ о Рома, хаськирла э культура, чюрдэ пэскэ про урдэн со сыс локхэдыр и лыя тэ джян ко Парижо.
 
Адатыр дрэ Романы чиб сы лава: форо, ефта, охто, еня, дром...
 
Рома сыкадынэ дрэ Европа дро бэрш 1442 тэ палэ. На джинас, савэ сыс лэнгирэ диалекты. Э чиб на сыс екхори, сы латэ о диалекты. Тэ авэл прэ чиб, сыр Русска Рома пхэнэна сыр тут кхарна?, дрэ Молдова Влахи пхэнэнла сар бущос?, тэ адякэ дур. Прэ бибахт, нанэ амэндэ хоть екхоро лаворо чиндо адалэ ромэндыр, сывэ чюрдынэ э Грецыя тэ парувэн пэскири бахт пураны прэ Европакири бахт нэви. Сыс ракхно о лылоро пхурано, кай сы чиндлы э чиб э романы, сыр ракирэнас адалэ ромэнгирэ чяворэнгирэ чяворэ дро бэрш 1562 (дыкх: philology.ru/liloro/romanes ).
Со кэрэнас о рома кэ Грецыя? На мишто джинас адава. Сы амэндэ набут лыла, документы. Чёрорэ материалы ракирна, сыр о Рома или о ваврэ мануша дромэскирэ, сыр о рома - калэбалэнгирэ, дорэсэнас про маро дрэ форья: сыклякирэнас тэ сыкавэна гадженгэ э рычен, ваврэ сыс бут годявэр, сыклякирдэ тэ сыкавэн о цырко: о мурша кхэлэнас прэ прастандынэ грэндэ, э чяя лынэ тэ псирэн, тэ кхэлэн про шэло упрал. Никифорос Григорас, о Греко, ачья о лыл, кай адава саро сы чиндло. Машкир ваврэ лава ёв тходя, хай о пхурэ мануша дро Константинополис на дыкхнэ тэ на шундлэ адава англэдыр. Адатыр амэнгэ сы hалыно, хай нанэ ада форо дрэ бэрша 1282-1328 (тэло Андронико о дуйто, императоро) про пурано дром ада акробатонгэ. Традэлас лэн сави бибахт э Азиятыр? Сыс о рома - на сыс о рома, саекх ёнэ авнэ дро баро форо дурал. Сыс ваврэ рома, бэшэнас про штэто, дживэнас пэскирэ бутятыр: екхэ кэрэнас буты састырэнца, ваврэ кхувэнас корзинья, сети, тэ адякэ дур.
О форо Модон дрэ бельвелякиро (западно) Грецыя сыс о штэто, кай мануша савэ кэрэна о дром пиро паны Машкирпхувьенгиро морё лынэ тэ уштавэн про курко тэ скэдэн э зор про дуруно дром ко Иерусалимо, кай сы о гробо Христоскиро. Ваврэпхувьенгирэ дромэскрэ мануша (Италиятыр, Франциятыр, Германиятыр) чинэнас лыла, кай пашо форо Модон сыс бут-набут 300 чёрорэ кхэрорэ, кай о калэ мануша кэрэна бутя састырэнца, ёнэ бэшэнас прэ пхув, о састыр чювэна про саструно кило, саво сы дыкхно сыр о допо кэлдэраренгиро, вмардо дрэ пхув андрэ.
Сы зракхнэ лыла (документы) бэршэндыр 1468, 1497. Ёнэ сыкавэна, сыр дро Модоноскиро агор о рома сы бэшлэ (дживэнас постоянно). Др одо бэрша ваврэ Рома сы прэ Европакирэ дрома, ёнэ нашэна кэ Европа. Соскэ о Модоноскирэ бутярья на скэдэна пэс дро дром? Нанэ джиндло. Сы адасави патрин, хай екхэ штэтостыр, со кхардо о Цыгно Египто, о Рома прастана аври, др одо время о штэто, со кхардо gyppe, o egyptos mikros - о дуйто (?) Цыгно Египто, сы пхэрдо Ромэн, савэ бэшэна прэ пхув тэ кэрэна буты пашэ пэскирэ пишоты (тэ пхурдэн э яг). Варэ-кон патял, хай о Рома-чёра прастандынэ кэ Европа, а бутярнэ Рома ачнэ тэ кэрэн буты ваш Турцыякирэ агрессоры. Амэ на ласа тэ чюрдас савэ лава прэ манушэн. Др ада дывэса о марибэн на джялас сыго прэ сари бари риг. Екх дывэс о дром - тэ никон на шунэлас, кай сы о марибэн.
Э империя (одо сыс екхори империя дрэ Европа) Византия сыс э бутэнародонгири пхув, одой мануша сыс дро Христоскиро дэвлыпэн (confession), сыр о Турки сыс дро Мухамедоскиро. Адава сыс о пункто катыр гынэ барэ бангипэна манушэнгэ, савэ прастанас аври э пхувьятыр. Сыр э Ромэндэ сыс пало думо о Баро Дром, на сыс ёнэ зуралэс пхандлэ кэ пхув, ёнэ лэнас тэ джян дурыдыр дрэ Европа. На сарэ рома нашлэ. Чячё тэ пхэнас, бут Рома ачнэ тэл э Турциякири зор. Бут сы о Рома про свэто, савэ гынэ дро Мухамедоскиро дэвлыпэн (о исламо). Сарэ Рома сы амарэ пшала, сарэ выгынэ аври э Индиятыр. Сыр о мануш кхарла пэскирэс Дэвлэс, дава сы лэскири буты. Сыр о мануш кэрэла лачо ваврэнгэ, ёв патяла чячес дро чячюно Дэвэл. Нанэ лачё токо, сыр ёв патяла, хай лэскиро Дэвэл пхэнэла лэскэ тэ кэрэл э бибахт ваврэнгэ.
Нэ, тэ рисёвас палэ дрэ византия. Трэби амэнгэ тэ джинас, сыр дживэна мануша панджшэла бэрша палэ. Екхэ ригатыр, амэ дживаса сыгыдыр амарэ папондыр. Ёнэ традэнас прэ грэндэ. Сыр лодэнас о Рома, ёнэ кэрэнас урдэнэнца мэк биш километры дро дывэс. Сыр кэрэнас пандждэша, трэби сыс тэ дэн грэнгэ тэ манушэнгэ о локхо дывэс. Ваврэ ригатыр, о рая сыс бут, о рангирэ пхувья сыс бутыр. Шэл километры - тэ ужэ э вавир пхув, государство, граница. Мишто? - Барэ раскэ сыс э пхэрды воля про лэскиро штэто. На зуралэс мишто ваврэнгэ. Ваврэ мануша сыс дрэ лэскири воля. Екх холямо рай сыс о хулай прэ пэскири пхув. Упрыдыр лэстыр сыс екх о Дэвэл. О Рома др одо бэрша сыс дромэнгрэ мануша. На камэнас тэ попэрэн про якха рангэ. Сыр амэнгэ тэ гинас лэн? Нашты. Кон попэя про якха рангэ, кон попыя дрэ лыла, сыс - hалёв - хасино. Надыкхнэ - ваврэ дживэнас дурыдыр романэс, нэ амэндэ нанэ джиндло мэк екхоро лаворо пал лэндэ. Нанэ амэндэ э пхэрды патрин адалэ бэршэндыр. Сы амэндэ котэра ваврэ манушэнгирэ историендыр.
 
"Сапвало" в Интернете"
"Сапвало" кай Интернето"
 
О дэшушовто котэр дрэ "Романы история", тходы ла ранятыр Milena Huebschmannova, сы мандэ пиро ди бутэдыр сарэндыр. Адава сы "Sapvale" dre Byzancia ("Сапвалэ" дрэ Византия.). Сапвалэ сыс о мануша сапэнгирэ, савэ барьякирнас, сыклякирнас тэ сыкавэнас пирэ гава сапэн.
Э философия чибакири. Дрэ Азия сыр камэна тэ сыкавэн о времё [э вреамя, e vrama, о часо, о cajto, o casos, o сiro] сыкавэнас прэ патрин о сапэс пасиндлэс ангрустяса, хай ёв лыя тэ хал пэскири пори. Э бари романы годы сыс тэ хасёл о Индиякиро лав ваш о времё. Мэ патява, хай дава сыс о англуно штэто, кай локхо сы тэ ухтылэл дая идея, тэ чюрдав да идея дрэ годякири рат, кай нанэ о лав, кай нанэ о дром тэ дас пэскири годы тэл э ваврэнгири зор, дрэ данда ада категориякэ. И о тыкно чяворо дыкхэла, сыр о лав ваш ада категория сы гаджикано, дава лав - hалёв - сы хохано. Мишто! О сап бандино ангрустяса, сыр о пасиндло "охто", ада хохано биагорэскиро сабэн, лэла тэ дандырэл пэскири пори жык одова, кай о чячюно лав джидёла тэ инкэрэла э сапэс дрэ да зор, сави сы стходы чибьятыр, э материятыр саныдыр сарэндыр, кай э дукх, кай э дар, кай э зор трашанэ годякири сы кхувдэ кхэтанэ дрэ надыкхны патрин, сави нашты манушэнгэ тэ кэрэл фэдыр, сыр нашты тэ парувэл, тэ хохавэл э дакири чиб. О куч бар сы чиндло ваврэса, э чиб нашты тэ чинэс ласа, сыр да сапэскэ нашты тэ хал пэскири пори, адава сы лэскири биагорэскири буты тэ дандырэл ничи, сыр э манушэскэ годякэ нашты тэ хал э чиб. О барэ мануша латхнэ о екх лыл, кай сы о лав палэ ромэндэ. Ада пхурано лыл, кай сы зракхно о лаворо ваш Ромэнгэ, сы о свято джиибэн екхэ манушэскиро э Грузиятыр. О свято Георгио Афоноскиро (Гиорги Мтацминдели, 1009-1065). О мануш сыклякирдо одолэ Георгиостыр, о Геогио Тыкно, стходя пэскирэ вастэса да святонэ манушэскиро джиибэн дро монастырё Грузиякиро (Иверон), ко Афоно дрэ Грецыя. Ёв кэрдя ада лыл дро бэрш 1068, сыго палэ одо дывэса, сыр о свято мануш гыя ко амарэ Дадэскэ, тэ лавэнгэ сыр гынэ да святонэ манушэстыр трэби тэ патяс. Ёв сыкавэлас Ромэн, савэ джинэна сыр тэ залэнпэ сапэнгирэ отравэнца. Кон джинэл, на сыс ли одолэ Рома спхандлэ долэ Сапвалэнца, савэ явнэ э Индиятыр?
 
25 июля 2003 г. В.В.Шаповал, доц. каф. методики преп. истории Моск. городского пед. ун-та